Դեսպան Սարգսյանը իր հավատարմագրերը հանձնեց ԱՄՆ Նախագահին

14 հուլիսի, 2014

Ամերիկայի Միացյալ Նահանգներում ՀՀ նորանշանակ դեսպան Տիգրան Սարգսյանը հուլիսի 14-ին իր հավատարմագրերը հանձնեց ԱՄՆ Նախագահ Բարաք Օբամային:

Հավատարմագրերի հանձնման պաշտոնական արարողությանը դեսպան Սարգսյանը նշեց, որ հայ-ամերիկյան հարաբերությունները առանձնանում են բարձր մակարդակով և արդյունավետ համագործակցութամբ։ ՀՀ դեսպանը հավելեց, որ երկու երկրների միջև առկա է հարաբերությունների զարգացման մեծ ներուժ, և իր առաքելությունն ուղղված է լինելու փոխշահավետ համագործակցության զարգացմանն ու դրա ոլորտների ընդլայնմանը:

Ողջունելով և շնորհավորելով Տիգրան Սարգսյանին դիվանագիտական առաքելության մեկնարկի կապակցությամբ՝ ԱՄՆ Նախագահ Բարաք Օբաման վստահություն հայտնեց, որ ՀՀ նորանշանակ դեսպանն իր հարուստ փորձն ու գիտելիքները լավագույնս կծառայեցնի երկու բարեկամ ժողովուրդների և երկրների միջև հարաբերությունների խորացման գործին:

Նախագահ Օբաման շեշտեց, որ Միացյալ Նահանգները կարևորում է Հայաստանի հետ փոխադարձ հարգանքի և շահերի վրա հիմնված հարաբերությունները, գործընկերությունը միջազգային խաղաղապահ առաքելություններում, ինչպես նաև ժողովրդավարության ամրապնդման և տնտեսական զարգացման ուղղությամբ համագործակցությունը:

Նախագահ Օբաման ընդգծեց նաև, որ Միացյալ Նահանգները բարձր է գնահատում Հայաստանի հանձնառությունը՝ հասնելու Լեռնային Ղարաբաղի հիմնախնդրի խաղաղ կարգավորմանը և ամրապնդելու Հարավային Կովկասի անվտանգությունը:

Զրուցակիցները ընդգծեցին, որ ամերիկահայ համայնքը կարևոր դերակատարություն ունի երկու երկրների միջև բարեկամական հարաբերությունների զարգացման գործում:

Հուլիսի 3-ին ԱՄՆ-ում ՀՀ դեսպան Տիգրան Սարգսյանը ԱՄՆ Պետքարտուղարությունում իր հավատարմագրերի կրկնօրինակները հանձնեց ԱՄՆ Պետքարտուղարի տեղակալ Հեդեր Հիգգինբոթթոմին (Heather Higginbottom): Առանձնազրույցի ընթացքում դեսպան Սարգսյանը եւ Պետքարտուղարի տեղակալ Հիգգինբոթթոմը քննարկեցին ՀՀ-ԱՄՆ համագործակցության հիմնական ուղղությունները եւ հարաբերությունների ամրապնդման ու զարգացման հեռանկարները:

Նույն օրը դեսպան Սարգսյանը հանդիպում ունեցավ նաեւ ԱՄՆ Արարողակարգի պետ դեսպան Պիտեր Սելֆրիջի եւ ԱՄՆ պետքարտուղարի` Եվրոպայի եւ Եվրասիայի հարցերով փոխտեղակալ Էրիկ Ռուբինի հետ: Զրուցակիցներն անդրադարձան երկկողմ համագործակցության հարցերի լայն շրջանակին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր