Վիզային ռեժիմի փոխհամաձայնություն Հայաստանի և Միացյալ Նահանգների միջև

11 դեկտեմբերի, 2014

ՀՀ կառավարության 2014թ. դեկտեմբերի 11-ի որոշմամբ` 2015թ. հունվարի 1-ից Ամերիկայի Միացյալ Նահանգների քաղաքացիների համար սահմանվել է առանց մուտքի վիզայի այցելությունների ռեժիմ: Որոշման համաձայն` Ամերիկայի Միացյալ Նահանգների քաղաքացիները կարող են այցելել Հայաստանի Հանրապետություն և գտնվել Հայաստանի Հանրապետության տարածքում առավելագույնը 180 օր ժամկետով` մեկ տարվա ընթացքում` ազատելով նրանց մուտքի վիզա ձեռք բերելու պահանջից:

2015թ. հունվարի 1-ից Միացյալ Նահանգները կսկսի վիզաների թողարկումը Հայաստանի Հանրապետության հետ ձեռք բերված նոր փոխադարձ պայմանավորվածությունների համաձայն: Տուրիստական ու գործնական նպատակներով Միացյալ Նահանգներ այցեր կատարելու համար ոչ ներգաղթային B տեսակի վիզայի համար դիմող ՀՀ քաղաքացիներին կտրամադրվի բազմակի մուտքի վիզա՝ մինչև 10 տարի վավերականության ժամկետով: Նաև, մինչև 5 տարի վավերականության ժամկետով բազմակի մուտքի F, M, կամ J տեսակի վիզաներ կտրամադրվեն ուսման նպատակով մեկնողներին, փոխանակման ծրագրերի մասնակիցներին ու նրանց խնամքի տակ գտնվող անձանց:

Ազատականացված վիզային ռեժիմի ներդրումն առաջ էր քաշվել անցյալ տարի Վաշինգտոնում կայացած Տնտեսական համագործակցության հայ-ամերիկյան միջկառավարական աշխատանքային խմբի հանդիպման ընթացքում, որի արդյունքում ստորագրված գործողությունների ծրագրի 28-րդ կետի համաձայն` «Երկու կողմերը կվերջնականացնեն վիզայի ազատականացման գործընթացը` հաստատելով ազատ վիզայի ռեժիմ Ամերիկայի Միացյալ Նահանգների քաղաքացիների համար, ինչպես նաև տաս տարի բազմակի մուտքի վիզա Հայաստանի Հանրապետության քաղաքացիների համար»:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր