Լոս Անջելեսում Արևմտյան Ամերիկայի Հայ Դատի հանձնախմբի կողմից կազմակերպված գալա ընդունելություն

20 հոկտեմբերի, 2019

Ս.թ. հոկտեմբերի 20-ին Լոս Անջելեսում տեղի ունեցավ Արևմտյան Ամերիկայի Հայ Դատի հանձնախմբի կողմից կազմակերպված գալա ընդունելությունը, որի ընթացքում ամփոփվեցին կազմակերպության կողմից անցյալ մեկ տարվա գործունեության արդյունքները:
ԱՄՆ-ում ՀՀ արտակարգ և լիազոր դեսպան Վարուժան Ներսեսյանն իր ելույթում կարևորեց Հանձնախմբի կողմից որդեգրած առաքելության իրականացմանն ուղղված քայլերը: Մասնավորապես, դեսպանն ընդգծեց հայոց ցեղասպանության ճանաչման գործընթացի առաջմղման հարցում Հանձնախմբի կողմից իրականացվող աշխատանքները, նշելով, որ Թուրքիայի ժխտողական քաղաքականության հետևանքները տեսանելի են նաև այսօր:
Դեսպանն առանձնակի անդրադարձ կատարեց ընթացիկ տարվա սեպտեմբերին ՀՀ վարչապետ Նիկոլ Փաշինյանի՝ Լոս Անջելես պատմական նշանակության այցին, նշելով, որ այցի ընթացքում կայացած հանդիպումները, ստորագրված փաստաթղթերն ու բիզնես ֆորումը որակական նոր մակարդակի և ինստիտուցիոնալ նոր հարթության վրա դրեցին Հայաստանի և Կալիֆորնիայի միջև հարաբերությունները: Դեսպան Ներսեսյանը նշեց, որ վարչապետ Փաշինյանի՝ Գրանդ Փարքում ամերիկացի պաշտոնյաների, տասնյակ հազարավոր հայերի առջև ունեցած ելույթը յուրովի նոր խթան հաղորդեց Հայաստան-Սփյուռք միասնությանը, որը Ստեփանակերտի Վերածննդի հրապարակում հնչեցրած համահայկականության գաղափարի մասն է կազմում: Այս համատեքստում, դեսպանը կարևորեց Արևմտյան Ամերիկայի համահայկական խորհրդի կազմավորման հարցում Արևմտյան Ամերիկայի Հայ Դատի հանձնախմբի ակտիվ դերակատարությունը:
Անդրադառնալով Հանձնախմբի կողմից տարբեր ոլորտներում իրականացվող գործունեությանը և գրանցած ձեռքբերումներին՝ դեսպան Ներսեսյանը վստահություն հայտնեց, որ ապագայում ևս Արևմտյան Ամերիկայի Հայ Դատի Հանձնախումբը կշարունակի իրականացնել իր առաքելությունը նույն վճռականությամբ ու եռանդով:
Ելույթի ավարտին դեսպան Ներսեսյանը շնորհավորեց Լոս Անջելես մարզի կառավարիչ Քեթրին Բարգերին՝ Կոմիտեի՝ «Տարվա կին» անվանակարգում մրցանակին արժանանալու կապակցությամբ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր