ՀՀ Զինված ուժերի կազմավորման 28-ամյակին նվիրված ընդունելություն

30 հունվարի, 2020

Ս․թ․ հունվարի 30-ին Վաշինգտոնում ՀՀ դեսպանությունում տեղի ունեցավ ՀՀ Զինված ուժերի կազմավորման 28-ամյակին նվիրված ընդունելություն։
Իր ելույթում ԱՄՆ-ում ՀՀ դեսպան Վարուժան Ներսեսյանը անդրադարձ կատարեց ՀՀ զինված ուժերի կայացման ուղուն, ընդգծելով, որ այն հանդիսանում է Հայաստանի անվտանգության անկյունաքարը։
Դեսպանը նաև շեշտեց հայ-ամերիկյան ռազմական համագործակցության կարևորությունը անցյալ տարի մեկնարկած ռազմավարական երկխոսության համատեքստում, որն ապահովում է հարթակ համապարփակ քննարկումների համար։
Դեսպան Ներսեսյանը հարգանքի տուրք մատուցեց մեր հայրենիքի պաշտպանության համար իրենց կյանքը զոհած հայորդիների հիշատակին և երախտագիտություն հայտնեց բոլոր այն զինվորականներին, ովքեր ապահովում են խաղաղությունն ու անվտանգությունը։
Վաշինգտոնում ՀՀ դեսպանության ռազմական կցորդ, գնդապետ Արման Մկրտչյանն իր ելույթում ընդգծեց, որ մեր զինծառայողները ոչ միայն անառիկ են պահում մեր սահմանները, այլ նաև տարբեր միջազգային ձևաչափերի հետ համագործակցաբար խաղաղապահ գործունեության միջոցով անվտանգություն են ապահովում Կոսովոյում, Աֆղանստանում, ինչպես նաև Լիբանանում և Մալիում։
ԱՄՆ Պաշտպանության քարտուղարի փոխտեղակալ Լորա Քուփերը շնորհավորելով Զինված ուժերի օրվա առթիվ, կիսվեց Հայաստան իր վերջին այցի տպավորություններով՝ գոհունակություն հայտնելով հայաստանյան իշխանությունների հետ լայն և համապարփակ համագործակցության առթիվ։ Նա նաև շեշտեց Կանզասի ազգային գվարսիայի հետ պետական համագործակցության ծրագրի կարևորությունը՝ որպես Հայաստանի հետ ռազմական համագործակցության հիմնաքար։
Կանզասի Ազգային գվարդիայի ադյուտանտ, գեներալ-մայոր Լի Տաֆանելլին իր ելույթում կիսվեց օրեր առաջ Հայաստան իր այցի տպավորություններով:
Ընդունելությանը ներկա էին Վաշինգտոնում հավատարմագրված դեսպաններ, ռազմական կցորդներ, Պաշտպանության քարտուղարության, Պետքարտուղարության ներկայացուցիչներ, դիվանագիտական կորպուսի ներկայացուցիչներ, հոգևոր հայրեր, հայ համայնքի մի շարք ներկայացուցիչներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր