Հայրենական մեծ պատերազմի հաղթանակի 75-ամյակին նվիրված միջոցառման վերաբերյալ

09 մայիսի, 2020

Ս.թ. մայիսի 9-ին ԱՄՆ-ում ՌԴ դեսպանության նախաձեռնությամբ, տեղի ունեցավ Հայրենական մեծ պատերազմի հաղթանակի 75-ամյակին նվիրված միջոցառում: Նոր տիպի կորոնավիրուսի համավարակով պայմանավորված, միջոցառումը անցկացվեց օն-լայն հարթակում:
Միջոցառմանը մասնակցում էին ԱՄՆ-ում ԱՊՀ անդամ երկրների դիվանագիտական ներկայացուցչությունների ղեկավարներ, ԱՄՆ-ում բնակվող Հայրենական պատերազմի վետերաններ, ինչպես նաև պատերազմում զոհված հերոսների զավակներն ու թոռները:
ԱՄՆ-ում ՀՀ դեսպան Վարուժան Ներսեսյանն իր ողջույնի խոսքում շնորհավորեց բոլորին կարևոր հաղթանակի հոբելյանի առթիվ՝ նշելով, որ սա ևս մեկ առիթ է Հայրենական պատերազմում զոհված հերոսների հիշատակի առջև խոնարհվելու և երախտագիտության խոսք հղելու նրանց, ովքեր իրենց մասնակցությամբ հնարավոր դարձրեցին ֆաշիզմի դեմ հաղթանակը:
Դեսպան Ներսեսյանը նշեց, որ հայ ազգի զավակները, ուս ուսի տված այլ երկրների իրենց եղնայրների և քույրերի հետ, կերտեցին մեծ հաղթանակը: Առանձնահատուկ ընդգծվեց, որ Հայրենական պատերազմին մասնակցել է ավելի քան 500 հազար հայ, որոնցից 300 հազարը Հայաստանից, 200հազարը՝ խորհրդային այլ երկրներից: 100 հազար ազգությամբ հայեր մարտնչել են հակահիտլերյան կոալիցիայի այլ զինված ուժերի կազմում՝ Խորհրդային Միությանը տալով հինգ մարշալ, առավել քան վաթսուն գեներալ, ավելի քան հարյուր հերոս: Մարշալ Բաղրամյանի, ադմիրալ Իսակովի, կրկնակի հերոս Նելսոն Ստեփանյանի և այլոց անունները և կերտած փառքի ուղին մինչ օրս ոգեշնչում են սերունդներին:
Դեսպան Ներսեսյանն ընդգծեց ամերիկահայ համայնքի ներկայացուցիչների ներդրումը Հայրենական պատերազմի հաղթանակում՝ առանձնացնելով Էրնեստ Դերվիշյանին, ով ցուցաբերած արիության համար պարգևատրվել է Միացյալ Նահանգների Պատվո շքանշանով, ինչպես նաև Ջորջ Յուսկալյանին, ով նույնպես արժանացել է զինվորական պարգևի:
Շնորհավորական ուղերձի ավարտին դեսպան Ներսեսյանը կրկին ողջունեց Հայրենական պատերազմի վետերաններին՝ մաղթելով նրանց քաջառողջություն և երկար տարիների կյանք:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր