ՀՀ ԱԺ Հայաստան-ԱՄՆ բարեկամական խմբի շրջանակներում աշխատանքային տեսակապ-հանդիպում

17 հուլիսի, 2020

Հուլիսի 17-ին, ԱՄՆ-ում ՀՀ դեսպան Վարուժան Ներսեսյանը, ՀՀ ԱԺ Հայաստան-ԱՄՆ բարեկամական խմբի շրջանակներում, խմբի ղեկավար Լիլիթ Մակունցի («Իմ քայլը» խմբակցության ղեկավար), Էդմոն Մարուքյանի («Լուսավոր Հայաստան» խմբակցության ղեկավար) և Վահե Էնֆիաջյանի (ԱԺ նախագահի տեղակալ, «Բարգավաճ Հայաստան» խմբակցություն) հետ տեսակոնֆերանսի միջոցով մասնակցեց Հայկական հարցերով կոնգրեսական հանձնախմբի համանախագահ Ֆրենք Փալլոնի և փոխնախագահ Ադամ Շիֆի հետ աշխատանքային քննարկմանը։
Հանդիպման սկզբում հայկական կողմը բարձր գնահատեց կոնգրեսականների ներդրումը հայ-ամերիկյան հարաբերությունների զարգացման գործում, Հայաստանին և Արցախին մշտապես ստարելու հարցում:
Կողմերը կարևորեցին երկու երկրների օրենսդիր մարմինների միջև համագործակցության հետագա ընդլայնումը և խորացումը:
Հանդիպմանը ՀՀ պատգամավորները ներկայացրեցին հուլիսի 12-ի կեսօրից սկսված ադրբեջանական զինված ուժերի կողմից ՀՀ Տավուշի մարզի ուղղությամբ հրադադարի խախտումները` որոնք ուղեկցվեցին նաև մարզի Բերդ քաղաքի և Չինարի ու Այգեպար գյուղերի քաղաքացիական ենթակառուցվածքների և բնակչության թիրախավորմամբ:
Այդ համատեքստում օրենսդիրները դատապարտեցին նաև Թուրքիայի կողմից տարածաշրջանային անվտանգության խաթարման փորձերը:
Հանդիպմանը կողմերն անդրադարձան նոր տիպի կորոնավիրուսի համավարակով պայմանավորված խնդիրներին: Հայկական կողմը ներկայացրեց ՀՀ կառավարության կողմից համավարակի հաղթահարմանն ուղղված քայլերը։ Այդ առնչությամբ հայ պատգամավորները շնորհակալություն հայտնեցին ամերիկյան կողմին՝ Հայաստանին ցուցաբերված աջակցության համար։
Պայմանավորվածություն ձեռք բերվեց համատեղ քայլեր ձեռնարկել ՀՀ ԱԺ և ԱՄՆ Կոնգրեսի միջև փոխգործակցությունը նոր մակարդակի բարձրացնելու ուղղությամբ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր