Դեսպան Ներսեսյանի ուղերձը Անկախության տոնի առթիվ

21 սեպտեմբերի, 2020

Հարգելի ընկերներ,

Ամերիկահայ համայնքի հարգելի ներկայացուցիչներ,

Շնորհավորում եմ բոլորիս Հայաստանի Հանրապետության անկախության 29-ամյակի առթիվ. Իրադարձություն, որը մեր հայկական հայրենիքի հազարամյա երկար պատմության, մեր հպարտությունը հանդիսացող հայկական ժառանգության համար անկյունաքարի դեր հանդիսացավ:

Սեպտեմբերի 21-ը աշխարհի համայն հայության համար կարևորագույն օր է, քանի որ մենք նշում ենք մեր ազգային պետականության վերածնունդը և որպես անկախ պետություն Հայաստանի վերադարձը երկրների համայնք:

Յուրաքանչյուր տարի սեպտեմբերի 21-ին մենք տոնում ենք մեր անկախության օրը և Հայաստանի դեսպանատանը հյուրընկալում մեր ընկերներին և համայնքին: Այս տարի, երբ մենք նշում ենք մեր Ազգային տոնը համավարակի պայմաններում, մենք չենք կարող կազմակերպել հյուրընկալություն և անձամբ բաժակ բարձրացնել ի փառս Հայաստանի անկախության:

Սակայն, մենք կարող ենք, յուրաքանչյուրս մեր սրտերում, յուրաքանչյուրս մեր տներում, Վաշինգտոնում և աշխարհով մեկ հիշատակել այն խիզախ ու երազող ոգիներին, ովքեր կանգնած են մեր պետականության ստեղծման հիմքում: Այսօր մենք նաև մեր շնորհակալական խոսքն ենք հղում հայկական զինված ուժերին՝ մեր պետականության ու անվտանգության պահապաններին և բոլոր նրանց, ովքեր շատ տարբեր եղանակներով ամրապնդում ու ապահովում են մեր սուրբ պետականությունը:

Դեպ անկախություն, դեպ պետականություն մեր ազգային երազանքի ուղին միշտ լի է եղել փորձություններով ու մարտահրավերներով: Մենք վերապրեցինք 1988 թվականի սարսափելի երկրաշարժը, հաղթահարեցինք տնտեսական ճգնաժամը, առավելություն ունեցանք ռազմական ագրեսիայի դեմ, և դիմացանք մեր սահմանների շրջափակմանը երկու երկրների կողմից: Մենք դիմացկունությամբ ու միասնականությամբ ենք առերեսվել յուրաքանչյուր փորձության:

Շնորհիվ մեր ժողովրդի միասնականության, նվիրվածության, տաղանդի ու խիզախության, մենք այսօր միջազգային հանրության պատասխանատու անդամ ենք և գործընկեր այն բոլոր երկրների համար, ովքեր հակված են համագործակցելու ի շահ խաղաղության ու զարգացման:

Սիրելի ընկերներ,

2018թ-ին հայ ժողովուրդը ևս մեկ անգամ ապացուցեց, որ մենք ենք մեր ազգային ճակատագրի սեփականատերը: Հայաստանում տեղի ունեցած Թավշյա, ոչ բռնի հեղափոխությունը մեր հիմնարար իրավունքների և ազատությունների հստակ իրացումն էր, որը մեր երկրի երկարամյա պատմության մեջ նշանավորվեց որպես մեծ քայլ դեպի ավելի ժողովրդավար հասարակություն: Այսօր, ես հպարտ եմ ասել, որ Հայաստանը աշխարհով մեկ ճանաչված է որպես առաջամարտիկ ժողովրդավարական բարեփոխումների բնագավառում:

Հայաստանի կառավարությունը շարունակում է իրականացնել նոր բարեփոխումների լայն շրջանակ, որոնք բոլորը միտված են ընդլայնելու մեր ժողովրդի քաղաքացիական, մարդասիրական և քաղաքական իրավունքները՝ հատուկ ուշադրություն դարձնելով արդարադատությանը, իրավապահ համակարգին և կոռուպցիայի դեմ պայքարին:

Սիրելի ընկերներ,

Նշելով այս օրը այստեղ՝ Վաշինգտոնում, ես կցանկանայի անդրադառնալ ՀՀ-ԱՄՆ գործընկերության ամուր և կայուն զարգացմանը:

Ինչպես գիտեք, այս տարի լրանում է մեր երկկողմ դիվանագիտական հարաբերությունների հաստատման հարյուր տարին: Վերջին մեկ դարի ընթացքում, մեր ժողովուրդների ամուր բարեկամությունը ավելի է ամրապնդվել՝ հիմնվելով ընդհանուր ժողովրդավարական արժեքների, ինչպես նաև մեր տարածաշրջանում ու աշխարհում խաղաղ, բեղուն ապագայի ընդհանուր տեսլականի վրա: Քայլ առ քայլ մեր հարաբերություններն ամրապնդվել են հայկական ժառանգությամբ ամերիկացիների կողմից, որոնց աջակցում են ամերիկյան հասարակության Հայաստանի դաշնակիցներն ու ամերիկյան վարչակազմում և Կոնգրեսում մեր բազմաթիվ ընկերները:

Ես ուրախ եմ տեղեկացնել, որ Թավշյա հեղափոխությունից հետո մեր երկրները մեր հարաբերությունները հասցրեցին Ռազմավարական երկխոսության մակարդակի՝ արտացոլելով մեր ընդհանուր հանձնառությունը՝ համագործակցելու տարածաշրջանային, առևտրային, էներգետիկ, տեխնոլոգիական, պաշտպանական և մարդասիրական հարցերի լայն ոլորտներում: Այս ոգով մենք այս օրերին հեռավար տարբերակով անց ենք կացնում Ռազմավարական երկխոսության երկրորդ նիստը, ինչը պայմանավորված է կորոնավիրուսային համավարակով:

Ամերիկայի Միացյալ Նահանգները մեկ դար առաջ և այսօր, միշտ էլ առաջնամարտիկն է եղել Հայաստանի անկախության, կայուն ու կառուցողական կերպով աջակցելով մեր անկախությանը, ինքիշխանությանը և մեր ժողովրդավարությանը: Մենք արժևորում ենք մեր գործընկերությունը և ակնկալում դրանց զարգացումը գալիք շաբաթների, ամիսների ու տարիների ընթացքում:

Հարգելի ընկերներ,

Եվս մեկ անգամ հայտնում եմ իմ շնորհակալությունը: Ինձ համար մեծագույն հաճույք է Ձեզ հետ նշել Հայաստանի հանրապետություն Անկախության օրը:

ՇՆՈՐՀԱՎՈՐ ԱՆԿԱԽՈՒԹՅԱՆ ՏՈՆԸ, ՀԱՐԳԵԼԻ ՀԱՅՐԵՆԱԿԻՑՆԵՐ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր