Դեսպան Մակունցի՝ Ֆրեզնո այցի վերաբերյալ

23 հոկտեմբերի, 2021

Ս.թ. հոկտեմբերի 23-ին ԱՄՆ-ում ՀՀ դեսպան Լիլիթ Մակունցը այցելեց Ֆրեզնո՝ մասնակցելու Ամերիկայի Հայ Ավետարանչական Ընկերակցության 102-րդ ամենամյա ընթրիք-հանդիպմանը:

Իր ելույթում դեսպանը բարձր գնահատեց Ընկերակցության կողմից հայերին դարից ավելի ցուցաբերված աջակցությունը, շեշտելով 1988թ. երկրաշարժից հետո, Արցախյան առաջին պատերազմի ընթացքում, անկախության հռչակումից ի վեր, ինչպես նաև արցախյան երկրորդ պատերազմից հետո Հայաստանին ցուցաբերված հսկայական օգնությունը և առանձնանշեց տեղում իրականացվող մարդասիրական հսկայածավալ աշխատանքը:

Դեսպան Մակունցը անդրադարձ կատարեց նաև Ընկերակցության կողմից աշխարհով մեկ իրականացվող կրթական ծրագրերին՝ բնորոշելով դրանք Հայաստանում, Արցախում ու Սփյուռքում բնակվող հայերի միասնականություն ապահովող արդյունավետ եղանակ:

Ֆրեզնո կատարած մեկօրյա այցի ընթացքում դեսպան Մակունցը հանդիպեց Ֆրեզնոյի քաղաքային խորհրդի անդամ Մայք Քարբասսիի և պրոֆեսոր Հարրի Հարրիսի հետ: Քննարկվել են փոխադարձ հետաքրքրություն ներկայացնող հարցերի լայն շրջանակ:

Հոկտեմբերի 24-ին դեսպան Մակունցը այցելեց Ֆաուլեր քաղաքում գտնվող Սուրբ Գրիգոր Լուսավորիչ և Ֆրեզնոյում գտնվող Սուրբ Երրորդություն եկեղեցիներ և մասնակցեց առավոտյան պատարագներին:

Դեսպան Մակունցը ծաղիկներ է խոնարհել Ֆրեզնոյի պետական համալսարանի տարածքում Հայոց Ցեղասպանության զոհերի հիշատակը հավերժացնող հուշահամալիրում:

Դեսպանն այցելել է Վիլյամ Սարոյանի տուն-թանգարան, այնուհետ ուղևորվել հայկական գերեզմանատուն և ծաղիկներ խոնարհել Սողոմոն Թեհլիրյանի ու Վիլյամ Սարոյանի շիրիմներին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր