Հայկական Օլիմպիական խաղեր ԱՄՆ-ում

02 սեպտեմբերի, 2013

Օգոստոսի 29-ից սեպտեմբերի 2-ը Վաշինգտոնում տեղի ունեցան Հայկական երիտասարդական միության 80-րդ Օլիմպիական խաղերը, որոնց մասնակցեցին ԱՄՆ եւ Կանադային ՀԵՄ տարբեր մասնաճյուղերի մոտ երկու հազար մարզիկներ եւ հյուրեր: Օլիմպիական խաղերի շրջանակներում մրցաշարեր անցկացվեցին տարբեր սպորտաձեւերում:

Սեպտեմբերի 1-ին տեղի ունեցավ Հայկական երիտասարդական միության Օլիպիական խաղերի բացման հանդիսավոր արարողությունը, որի մասնակիցներին ուղղված խոսքում ԱՄՆ-ում ՀՀ դեսպան Թաթուլ Մարգարյանը նշեց, որ նմանօրինակ միջոցառումները ոչ միայն մարզական նշանակություն ունեն, այլեւ բացառիկ հնարավորություն են ստեղծում Սփյուռքում հայ երիտասարդության համախմբման, հայկական ինքնության, մշակյույթի եւ ավանդույթների պահպանման եւ զարգացման գործում:

Բացման արարողության նախօրեին Հայկական երիտասարդական միության ներկա եւ նախկին անդամների 50 հոգանոց պատվիրակությունն այցելեց ՀՀ դեսպանություն: Դեսպան Մարգարյանի հետ կայացած զրույցի ընթացքում արծարծվեցին ամերիկահայ համայնքին հուզող բազմաթիվ հարցեր, որոնք, մասնավորապես, վերաբերում էին Հայաստանի արտաքին եւ ներքին քաղաքականությանը, տարածաշրջանում եւ Մերձավոր Արեւելքում ընթացող զարգացումների վերաբերյալ ՀՀ դիրքորոշմանը, ղարաբաղյան հակամարտության խաղաղ կարգավորման գործընթացին եւ Հայաստանի հարաբերություններին հարեւան երկրների հետ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր